La Fraisne Old French: 457-500
La Fraisne
Old French
ll. 457-500
Quant de pasmoisons se levoit,
Por son seignor tost enveoit,
Et il i vient, toz esfreez.
Quant il en la chambre est entrez,
La dame li chaï as piez,
Estroitement li a baisiez,
Pardon li quiert de son mesfet.
Il ne sot noient de ce plet:
"Dame," fet il, "que dites vos?
Ja n'a se bien non entre nos.
Quanque vos plet, soit pardonné!
Dites moi vostre volenté!"
"Sire, quant pardonné l'avez
Jel vos dirai, si m'escoutez."
(Kib Ch 14)
"Jadis, par ma grant vilenie,
De ma voisine dis folie:
De ses deus enfanz mesparlai;
Vers moi meïsmes mesdit ai.
Veritez est je ençaintai;
Deus filles oi, l'une en celai,
A un mostier la fis geter,
E nostre paille o li porter,
Et l'anel que vos me donastes,
Quant vos primes o moi parlastes.
Ne vos puet mie estre celé:
Le anel et le paille ai trové,
Nostre fille ai ci coneüe,
Que par ma pechié oi perdue.
Et ja est ce la damoisele,
Qui tant est preuz e sage e bele,
Que li chevalier a amee
Qui sa seror a espousee.
Le sires dit: "De ce sui liez,
Onques mes ne fui si haitiez.
Quant no fille ravon trovee,
Grant joie nos a Deus donee,
Ainz que li pechiez fust doublez.
Fille," fet il, "avant venez.
La meschine molt s'esjoï
De l'aventure qu'ele oï.
Son pere n'i volt plus atendre,
Il meïsmes va por son gendre
Et l'arcevesque i amena;
Cele aventure li conta.