La Fraisne Old French: 311-58
La Fraisne
Old French
ll. 311-58
La meschine bien les garda,
En un coffre les enferma.
Le coffre fist o soi porter,
Nu volt lessier ne oublier.
Li chevaler qui l'enmena
Molt la chieri e molt l'ama;
Tuit si homme e si serjant.
N'i ot un seul, petit ne grant,
Por sa franchise ne l'amast
Ne la servist et l'anorast.
(Kib Ch 10)
Longuement a o li esté,
Tant que li chevalier fiefé
A molt grant mal li atornerent.
Sovente foiz a lui parlerent
C'une gentil fame espousast
Et de cele se delivrast:
Lié seroient s'il avoit oir,
Qui aprés lui peüst avoir
Sa terre e son heritage;
Trop i avroient grant dommage
Se il lessoit por sa soignant
Que d'espouse n'eüst enfant;
Jamés por seignor nu tendront
Ne volentiers nu serviront,
Se il ne fet lor volonté.
Li chevaliers a creanté
Qu'a lor conseil fame prendra;
Or esgardent ou ce sera.
"Sire," font il, "ci pres de nos,
A un preudom; per est a vos.
Une fille a, si n'a plus d'oir;
Molt poez terre o li avoir.
La Coudre a non la damoisele,
En tout cest païs n'a tant bele.
Por le Fresne que vos perdroiz
En eschange le Coudre avroiz.
En la coudre a noiz e deduiz,
Le fresne n'a unques nus fruiz.
La pucele porchaceron:
Se Deu plet, si la vos donron."
Ce mariage ont porchacié
Et de totes pars otroié.
Ha las! comme est mesavenu
Que li preudom n'orent seü
La verité des damoiseles,
Qui estoient serors jumeles.
Le Fresne cele fu celee;
L'autre a ses amis espousee.
Page 8